Вакансия: жас журналистер қажет

Достар, қазақ тілді интернет-жоба үшін жас журналистер қажет. Жұмыс Алматы қаласында болмақ. Бізге белсенді, ширақ, Қазнеттің дамуына ат салысамын дейтін, әдебиет, мәдениет тақырыбында жаза алатын студенттер немесе интернет-журналистика саласында тәжірибе жинаймын дегендер қажет.

Түйіндемені aliya@yvision.kz адресі бойынша жіберіңіз. Түйіндемемен бірге өзіңіздің мақалаларыңызды, блогыңыз бар болса, оған сілтеме, жарияланған және жарияланбаған жазбаларыңызды жіберсеңіздер, тіпті жақсы.

Мен де Блогкемп жайында…

Блогшылар құрылтайы жайында Интернетте қаншама жазба орнатылды, қаншама сурет, қаншама ресми ақпарат… Мен Мақпал мен Асхат аға жіберген пресс-релиздардан кейін (бұл қаңтар айынан басталды) шыны керек, бұндай ақпараттан жалықтым. Оған қоса, Блогкемп жайында жаңа ғана бір жазбаны бітірдім (орыс тілінде, Жаңа Еуразия үшін). Сонымен, көп сөздің қажеті не?

Мен үшін блогкемп керемет өтті, ал ұйымдастыру жағы мен хелптим жұмысы жоғары деңгейде болды  деп еш ойланбастан айта аламын 🙂 . Осыншама кісі келеді деп ойлаған да жоқпын, әсіресе шетелден келген блогшыларды көру қызық болды. Бұрыннан бері оқып жүрген Қалды қыз бен 6 градус, Розатай блогтарының иелерімен танысқаныма қуаныштымын, бұрыннан тек онлайнда таныс Сағынды оффлайнда көрудің де сәті түсті. Сонымен қатар, бұрыннан танитын, бірақ жиі көре бермейтін Қуаныш, Салтанат, Зере, Айко, Айкона, Мақпал, Есенгүл апай, Димаш, Тотыларды көрдім-ау. Айтпақшы, туғанынан бері тек интернеттегі фотолардан танитын Әминды енді өзім фотоға түсіре алдым 🙂

Барлық блогшылардың атын атай берсем, жазбам созылып кетер, сол себепті бар суреттерді жариялап, осымен доғарайын.

Талдықорғандағы «Мінбердің» семинары

Қазан айының 4-5 күндері Талдықорғанға барып қайтуға мүмкіндік туды, оның себебі жоқ емес. Жергілікті тамаша журналистермен танысып,  қаланың таза ауасын жұтып, демалып қайттік. Төменде семинардың суреттері, барлығы емес әрине.

Семинардың суреттері

Төртінші баркемпім

Сонымен, Орталық Азия BarCamp 2010 мәресіне жетті. Ол жайында жазылды, әлі де жазылады, жазылып жатыр да. Біреулер бұл тақырыптан шаршаса, басқалар шараның тез өтіп кеткеніне әлі де сенбей жүр. Былтырғыдай басты рахмет/алғыстарды Инесса Шлапак, Елена Джетпіспаева мен кОмпания (^_^) және Сорос-Қазақстанға айту керек.

Қазақ блогшыларына бөлек тоқталайық, Асхат аға, Анар, Салтанат, Айко, Қуаныш, Бақытгүл апай, Мақпал, Жалғас, Тимур және қатарымызға жаңадан қосылған ҚазҰУ-нің журфак студенттерімен кездестік, танысқандарымыз танысып, шамамыз келгенше, презентация жасаған болатынбыз. Менің презентациямды біреу қажет етсе, міне, Жалғастікі осы. Анара, Мақпал, сіздер де қосылыңыздар. Өкінішке орай, тура осы уақытта болып жатқан басқа да көптеген презентацияларға қатыса алмадық, бірақ екеуін көруге мүмкіндік бар:

«Yvision.kz» корпоративті блогтар туралы видео

Партизандық маркетинг видеосы

Интернет коммуникациялар туралы панельді пікір-талас

Баркемпте The Best Blog Award жүлдесінің қорытындысы шықты, жеңімпаздар төмендегідей:

Асхат Еркімбай – urimtal.wordpress.com

Ольга Цепилова – www.bookcase.kz

Дарын Кайпбаев – ragazzo.yvision.kz

Анар мен Салтанат бұл тізімде жоқ >_< бірақ өзіміз олардың блогтары керемет екенін онсыз да білеміз ғой. Ал Асхат ағаны тағы бір рет құттықтаймыз!

Өз фотоларым болмағасын, Нұрайымнан сұрап алуға тура келді.

Инесса мен Лена

The Best Blog Award қорытындысы, солдан оңға: Әділ Нұрмақов, Қазақтелеком қызметкерлері, Инесса, Я. Ажнюк (Украина)

Нурайка

«Біз жылдамдықта ұтылсақ, Интернет – сарапта»

Бүгін музыкалық журналистика жайында бір ақпарат берейін дегенмін, ақыры тағы да бәрі Жаңа Медиа мен Медиабизнеске тірелді. Заманына талабы демекші, дәстүрлі журналистиканың күн көрісі жайында тағы бір жазба.

The Wire журналының бас редкторы Тони Херрингтон музыкалық  журналистика мен басылымның жұмысы жайында қызықты сұхбат берген еді. Содан үзінді.

— Журналист мамандығының мәнісі неде?

— Өнердің басқа түрлері секілді музыка да поэтикалық, метафоралық сөздерге ұмтылады. Экзистенциалдық шындық, руханилықпен қоса, сезімталдыққа да бет алады. Жауаптар осында болу керек. Олар музыкада шифрланған. Журналистің басты және бірінші кезектегі мақсаты — бұл кодты ашу. Кейін оны сөзге айналдырып, оқырманға түсінікті етіп жеткізу.

Музыкалық журналистикада сыни сарап, зерттеу болған жөн. Кез келген музыкалық құбылысты түсініп, жан-жақты біліп және бастысы — оның ғажабын, күшін, қиялын түсіндіре білу қажет. The Wire журналына осындай журналистика қызықты. Және, өкінішке орай, ондай журналистика көп емес.

— Мүмкін, бұның себебі музыка жайында құрылымды мәтін оқығысы келетін оқырманның аздығында шығар? Музыка жайында қалың журналдар енді қызықсыз?

— Мен үйтіп ойламаймын. Музыкаға деген қол жетімділік оңтайланды, қазір ол көп, сол себепті адамдарға сенімді және беделді фильтрлер қажет. Мамандырылған қалың журналдарды алатын болсақ, меломандардың бізге деген талабы мынау – көптеген ақпараттың ішінен шынымен де керемет дегендерді ұсыну. Осыдан, The Wire секілді басылымдар ақпараттық шынжырда әлі де болса бас рөлді сомдауда: музыкант — тыңдаушылар.

Веб-журналистиканың мәнісі – жеткізу жылдамдығында. Интернет-медиа баспа журналдарына қарағанда жаңалықтар мен шаралардың өтуі жайында жеделірек жариялайды. Иә, ақырында ақпараттық баспасөз көлеңкеленеді. Қараңызшы, The Wire-дың баспа нұсқасы жаңалықтарға толып тұрмайды. Енді осының қажеті жоқ.

BarCampCA’10-ға қатыс!

Алдында айтылғандай, тревел-гранттарға өтініш қабылдау басталды. Егер де Алматы тұрғыны болмасаңыз, бірақ шараға қатысамын десеңіз, сіздің жолақы шығынын өтейтін грант алу мүмкіндігіңіз бар (Сорос Фондына рахмет!). Тек уақыт шектеулі екенін ұмытпаңыз.

Өтініш жіберу формасымен таныс болған шығарсыздар. Өтініштерді қазақ тілінде жазуға болады!

Хаттарды barcampkz[at]gmail[nukte]com адресіне Тревел грант тақырыбымен жіберіңіз. Егер де сұрақтарыңыз бар болса, тікелей маған хабарласуыңызға болады (alijakj[at]gmail[nukte]com).

Сайтта тіркелу басталды!

Қазақ интернеті мен оның қоғамдағы әсері

Кеше (27/03/2010) КИМЕП-те коммуникацияларға байланысты конференция өткен болатын. Асхат Еркімбай бұл конференцияда интернеттің қазақ тілді сегменті жайында баяндама жасаған еді. Естеріңізде болса, былтырғы жылдың қараша айында қазақ блогшылары арасында сауалнама жүргізген едік, соның нәтижесі алғаш рет айтылды:

Ішкі шектеулер;

Болжамдар;

Қазнеттің қазақ тілді бөлігі:

– күніне қанша қазақ тілді сайт қарайсыз;

– қазнет қолданушысының келбеті;

– қандай ресурстарға зәруміз;

– іздеу торабының қайсысы сұранысқа ие;

– қазнетті қалай дамытамыз.

Баяндаманың видеосын мына жерден көруге болады.

Олимпиада демеушілерінің жарнамасы

Олимпиада – спорт пен саясат әлемі үшін ғана емес, жарнама бизнесі үшін де маңызды оқиға. Ванкувердегі Олимпиаданың интернеттегі жарнама түрлері әрқилы. Әлеуметтік желілер, виджеттер, блогтар арқылы әр бренд өз жарнамасын қызықты етіп жасауға тырысады. Мысалы, Panasonic-тің демеушілігін «One Winter Five Dreams» сайтында көруге болады. Panasonic бренді әр елден келген аты аса белгілі емес бес спортшыны таңдап, сайтында олардың блогтарын ашқызып қойған. Спортшылар блогтарында Олимпиадаға қалай дайындалғанын, қиыншылықтар мен жеңістері жайында жазып тұрады.

Олимпиада демеушілері таңдаған интернет-жарнама әдістері жайында толығырақ.

Бүгінгі интернет

Telegraph басылымы бүгінде интернетте адамдардың ашуын тудыратын нәрселердің тізімін жасаған болатын. Осы тізімнен үзінді:

1. Жалқау белсенділік
Қазір бір нәрсеге қарсы екеніңізді көрсету үшін Facebook-тегі топқа қосылып немесе микроблогта ретвит жасау жеткілікті. Алайда, осындай наразылық білдірудің әдістерін дәстүрлі шерулермен салыстыруға болмайды. Электронды айқай-шудан басқа еш нәтиже жоқ деп айтуға болады. Мысалы, Махмуд Ахмадинежадтың режиміне қарсылық білдірген твиттеряндықтарды еске түсіріңіз.
2. Капча
Интернет өз пайдаланушыларын адам ба, әлде робот екенін тексеру үшін қайта-қайта басқатырғыш нәрселер ойлап табады. Оған қаншама уақытымыз кетеді. Егер де әр капчаға 10 секунд кететінін ескерсек, әлемнің интернет-қолданушылары күн сайын 150 мың сағатты босқа өткізеді. Жыл сайын капчалар күрделене береді.
3. Қозғалмалы жарнама
Баннерлік пен контекстті жарнамаға қарағанда қозғалмалы жарнама табыс аз әкелетіні белгілі. Алайда, веб-серфинг кезінде ашуымызды келтіретін элементтер де – осылар.
4. Пікір қалдырушылардың педантизмі
Егер де АҚШ конституциясы бірінші Интернетте жарияланса, пікір қалдырушылар орфографиялық қателер мен мәтіннің онша еместігі жайында міндетті түрде айтып өтуші еді.
5. Уақытты ұрлайтын Интернет
Шолғышты екі сағатқа болса да жауып қойсаңыз, әке-шешеңізге қоңырау шалуға немесе офлайндық достарыңызбен кездесуге болушы еді.
6. Кросс-тұғырнамалық байланыс
Коммуникациялық әдістердің көптігінен қиыншылықтар туа береді. Электрондық пошта мен Facebook-тегі хат алмасу, интернет-мессенджердегі әңгіме…, ақыры бәрі араласып кетіп, негізгі ойыңыз «далада» қалады.
7. Вирустық шабуылдар мен спам
Бұл Интернеттің мәңгі-бақи соры. Вирус пен спам күнде тек ұлғая береді.