Эстафетаны Кәмшаттан қабылдадым. Сонымен, менің де өте субъективті рейтингім.

Жылдың цитатасы: Алмас Темірбайдың өлеңінен үзінді:

Өмір солай… көзіңді ашып-жұмғанша,
Өте шығар сезім қанша, мұң қанша;
Сен сияқты бақытсыздар жүр қанша,
Мен сияқты ба-ғыт-сыз-дар жүр қанша!

ЖЫЛДЫҢ үздік сервисі: Твиттер емес Былтыр Твиттер болған да шығар, биыл FriendFeed.

…үздік фото-хостингі: Flickr және Pics.kz

…үздік видео-сервисі: Біздің Қазнетте 2009-да пайда болған Kiwi.kz

…үздік блог/сайттары: Lookatme.ru, Chaskor.ru, Mediapedia.ru және блогымның оң жағындағы тізім

…үздік интернет-дүкені: Flip.kz
…үздік актері: сол баяғы Пенелопа
…үздік кітабы: Ремарктың «Үш досы»

Жылдың телесериалы: TBBT
Жылдың ең үздік танысуы: Дәл 2009 жылы интернеттен (блог пен твиттерден) бұрыннан білетін біраз адаммен таныстым (шынайы өмірде олардың барлығы дерлік одан да керемет болып шықты ).

Ең күшті сыйлық: Canon 450D, Лондон мен Куала-Лумпурдағы «Арсенал» ф.к. дүкенінен келген заттар, Алматыдан қағаз хатпен келген білезік.

Осы жылы пайда болған қызығушылық: Микроблогингке қатысты. Осы тақырыпта блог та ашылды, бірақ, шыны керек, жылдың аяғына қарай бұл қызығушылығымнан шаршадым. Театрға деген «саналы» сезімдерім пайда болды.

Орындалмаған арман: Европаға барған жоқпын (алайда, Орталық Азияда біраз қыдырдым )
Орындалған арман: Біразы орындалды, шүкір.
Жылдың ең үздік орны: Жерорта теңізін көрдім!

…үздік дүкені: Kira Plastinina мен Benetton/kid&young/

…үздік аяқ киімі: қазір бүүүкіл қыздар киіп жүрген UGGS. Өте ыңғайлы.

…үздік тағамы: Былтырғыдай «Филадельфия» (Салта, Кәмшат, сәлем!) және тәттілерден – түріктің пишманиесі.

Эстафетаны Жаннаға тапсырдым.

Қазақ блогшылары арасында арнайы жүлде-сайыстар жоқтың қасы, алайда, оларға көңіл аударылмайды деп тағы айтуға болмайды. 2007 жылы Ұлттық «Мәссаған» порталы мен Қарағандылық үкіметтік емес ұйым өздерінің жеке жүлделерінде қазақ блогшыларына арнайы номинация арнаған-тын. Жеңімпаздар – блогшы Қуаныш Мағзуов пен Асхат Еркімбай болатын. 2008 жылы Award.kz жүлдесінде «Мемлекеттік тілдегі үздік сайт» номинациясында 3-орынды иеленіп, тағы екі номинация бойынша жеңімпаз атанған блогшы – Нұрғиса Асылбеков. Ал биылғы жылы Ansar атты блогшы “Біздің ауыл” үздік блогтар жүлдесі 2009 атты жобаны ұйымдастырмақшы. Осы жоба 01.07.2009 – 20.11.2009 мерзім аралығында өтеді.

Жоба қазақ тіліндегі блогтардың мәртебесін арттыру мен олардың сапасын жоғарылатуға бағытталған. Әрине, әр блогшыға мотивация қажет және осындай жүлделер арқылы әр блогшы Қазнеттегі өз маңыздылығын сезініп қалар деген үміттеміз. Жазбалардың саны мен сапасын арттыру да – жоба мақсаттарының бірі.

Жеңімпаздар мынадай аталымдар (номинация) бойынша анықталады:

Үздік аспаздық блог

Тағам дайындау мен соған қатысты ақпаратқа арналған блогтар жүлдесі. Блог тек қана аспаздыққа арналып жазылмаса да, бірақ осы тақырыптағы жазбаларды қамтитын болса, жеңімпаз атануы мүмкін.

Үздік жалпы блог

Жан-жақты ақпаратты қамтитын блог. Арнайы таңдаған бағыты болмаса да, тұрақты түрде жаңарып тұратын, күнделікті тыныс-тіршілік жайында баяндайтын блог.

Жаңалықтар блогы

Қазақстан және шетелдік түрлі саладағы жаңалықтар жайындағы блог. Ескерте кететін жәйт, басқа ақпарат көздерінен көшіріп алу арқылы жүргізілетін блогтар сайысқа түспейді. Автор ең болмағанда өзінің ойы мен көзқарасын көрсету керек. Шет тіліндегі ақпарат құралдарының жазбаларын аударып жариялайтын блогтар  да қатыса алады (ақпарат агенттігіне сілтеме жасайтын болса).

Үздік фото-блог

Фотосуреттер мен сурет өңдеу саласына арналған блогтар.

Үздік рухани блог

Рухани және діни құндылықтарға арналған блог. Көшіріп алынған жазбаларды жариялайтын блог сайысқа түспейді (сирек ақпаратты немесе аударма жасалған жазбаларды жариялайтын блогтар жүлдеге қатыса алады).

Үздік жаңашыл блог

Қазақ тіліндегі блогтардың ішінде ерекше немесе кенжелеу дамыған туындылары мен жазбалары (үнхабар, видеокаст және скринкаст т.с.с.) бар блог.

Үздік спорт туралы блог

Спорт тақырыбына арналған блог.

Үздік тақырыптық блог

Аспаздық пен фотосуреттен басқа мәселелердің біріне арналған тақырыптық блог.

“Біздің ауылдың” арнайы жүлдесі

Бұл жүлде қандай блогқа тағайындалатыны әзірге айтылмайды. Құпия

Үздіктерді анықтаудың шарттары:

• Блогыңызды тіркеуден өтікізудің қажеті жоқ. Белсенді блог көзге бірден түсетіні анық;
• Блог үнемі жаңару мен ізденісте болуы керек. Ай сайынғы жазбалардың саны кем дегенде 6 болуы шарт;
• Егер бір аталым бойынша жалғыз ғана блог болып, бірақ шарттарға сай болмаса, ол блогқа жүлде табыс етілмейді. Жобаның мақсаты – санға емес, сапаға назар аудару.
• Жүлдеге лайықты блогта ҚР заңнамалық актілеріне қарсы келетін ақпарат жарияланбауы керек.
• Бір блогты екі адамнан артық жүргізбеуі керек.
• Бұл жүлдеге БАҚ және мемлекеттік құрылымдарға қарасты блогтар қатыса алмайды.

Қосымша

“Біздің ауыл”-ға тиесілі блогтар қатыстырылмайды.

Блогтардың үздігін анықтаған кезде әрбір блогтағы жазбалардың маңыздылығына баса назар аударылады. Жазбадағы пікір саны мен блогтың қонақтар саны есепке алынбайды. Дизайнына да көңіл бөлінбейді. Себебі, кейбір блогтарда дизайнды өзгертуге арналған функциялар жоқ.

Тағайындалатын аталымдардың ешқайсысы дауыс беру арқылы анықталмайды.

Әрбір аталым бойынша бір ғана жеңімпаз болады. Яғни, бірінші, екінші және үшінші деген орындар болмайды.

Жеңімпаз блогқа аталымы жазылған  “Үздік блог – 2009″ деген белгі беріледі және электронды түрдегі дипломмен марапатталады.

Жеңімпазға естелік сыйлық тағайындалады.

Бұл жоба авторлық жоба болғандықтан, оның авторы арнайы бір міндеттемелерді өзіне жүктемейді.

Жобаның авторы жүлдеге арналған баннерді жасаған yvision.kz-тің блогшысы Kimberly-ге үлкен алғыс білдіреді.

Өмір туралы

Бұрын өмірді түсінуге тырыстым, енді өмірдің өзі мені түсінсін деп, ол жайында басымды қатыра бермеймін. Жалпы, өмірде кейде енжар болып қалған да артық етпес.

Өмірдің мәнісін іздеу жолында оның мәнсіздігіне көбірек ұрына береді екенсің.

Уақыт туралы

Уақытты әлі де бағалай алмай жүрмін. Кейде 18-ге толдым және одан әрі аспадым деген күйде болғандаймын. Бірақ, бұның бәрі өз-өзімді алдаушылық екеніне мән бергім де келмейді.

Отбасы туралы

Есейген соң осы сөздің мағынасы анау әліппедегі сурет емес екенін түсіндім, оның суретін салу қиын, түсіндіру де.

Ақша туралы

Ақша туралы қымбат (бағасы жоғары) нәрселерді көргенде ғана ойланамын. Басқасының құны жоқтай… Негізінде, ақша туралы мүлдем ойланбауға тырысамын. Бұл уақытша десеңіз, әбден мүмкін.

Достар туралы

Балабақшадағы достарым мектебіме көшті; мектептен университетіме көшкендер аз, бірақ жоқ емес. Университеттен «өміріме» көшкендер саусақпен санарлық. Бірақ ең жақыны солар. «Досым» деп көрінгенге айта бермеймін, тым жауапты лауазым.

Арман туралы

Армандарым орындалса, өмірім күрт өзгереді деп ойламаймын.

Әр арманым орындалсын деп тілемеймін.

Жұмыс пен хобби

Хобби жұмысың болып қалса, ол әуестенушілік болудан қалады. Жұмысың хобби болатын болса, не сорың, не бағың.

Ұстаным туралы

«Өмір сен сүйгендер мен сен ренжіткендерден құралады». Осы тұрғыдан өмір сүруге тырысамын. Иә, ол оңай емес.

Ақылға сыймайтын әрекеттер

Уақыт өте келе, кешегі ақылға сыймайтын әрекеттер бүгін қалыпты болып көрінеді. Мүмкін ақылға сыймайтындай әрекеттерім келешекте.

Болашақ туралы

«Біз ертеңгі күнді күтетінбіз, Күнде ертеңгі күнді күтетінбіз…» В. Цой

Эстафетаны Ақзереден қабылдап, Айнұрға тапсырдым.

2007 жылы әлі блогшы аталмай жүріп, Асхат ағаның көмегімен «Қазақ блогшылары» атты Google group-қа кірдім. Осылайша біраз қазақ блогшылармен танысып-білістім. Қазақ тілді блогосфера жайында әлеуметтік сауалнама жүргізген кезде де «Қазақ блогшыларының» көмегі тиді. Бүгінде қазақ блогшылар қатарына жаңадан қосылғандар аз емес, сол себепті, егер де ішкі хат алмасу торабында әлі жоқ болсаңыз, жазылыңыз!

Адресі http://groups.google.com/group/kazakh-bloggers

Электрондық почтаға жаңа хабарлар келіп түсу үшін мына бетті қараңыз http://groups.google.com/group/kazakh-bloggers/subscribe

Бір-бірімізбен танысып, жаңа хабарлармен бөлісейік!

Баркемп туралы жалғастыратын болсам, …
…журналист, әрі блогшы Әділ Нұрмақов Moblog.kz атты мобильді веблог жайында, оның функциялары мен қолдануы туралы айтып берді. Ресейде осындай моблогтар екеу болса, бізде енді ғана пайда болды. Интернет пен заң тақырыбында қарағандылық студент Шыңғыс Крайбеков BitTorrent-трекерлердің құқықтық реттеу мәселесін, оның ішінде авторлық құқықтар жайында сөз қозғады. Қызмет көрсету сайттарының ішінде астаналық студент Дармен Аманбаев Apartamenty.kz – пен таныстырды және үшінші күні өткен стартаптар сайысында бұл сайт бірнеше рет жүлдегер атанды. Стартаптар ішінде тағы бір қызық жоба – электрондық кітапхана Wormie.kz. Оны Ақтөбелік White Hill дизайн-студияcы жасап жатыр және дәл қазір елімізде оған ұқсас бірде-бір ресурс жоқтың қасы. Осыдан, бұл жобаның болашағы зор деп болжауға болады. Электрондық кітаптарға арналған осы сервис те BarCamp Ideas Market-тің жүлдегері атанды. Фотохостингке байланысты екі ресурс Pics.kz пен Canvas.kz (әлеуметтік фото-сервис) – ті астаналық Алексей Чубыкин мен Рустем Мұсабеков таныстырды. Ал подкастингке арналған қазақстандық терминал PodKAZt.kz – тің презентациясы подкастерлер павлодарлық Иван Богураев пен алматылық Әсет Нұрпейісовпен өткізілді. Терминалмен таныстыру барысында подкастинг деген не және қазақстандық подкастингтің дамуы жайында айтылып өтті. Сонымен қатар, Қазнет қолданушыларына танымал блог тұғырнама, әрі әлеуметтік желі функцияларын бірдей атқарып жүрген Yvision.kz пен видео сервис Kiwi.kz қызметі алдағы жоспарларымен бөлісіп, қолданушылардың сұрақтарына жауап берді.
Тағы мынадай стартаптар таныстырылды:
http://kazpartner.kz/ – франчайзингке арналған платформа.
http://www.kundelik.kz/ – оқушылардың ата-анасына арналған электронды күнделік.
uchi.kz және referaty.kz – білім беру.
www.artmachine.kz – өнер/шығармашылық/арт.
http://autoatlas.kz/ – Қазақстан жолдар атласы.
bbkz.kz – Beauty Business Kazakhstan – сәнқой ханымдарға арналған.
http://infox.kz/ – Молдатаев мырза ұсынады
inkar.info – Интернет-радио(көпшілікке таныс).
listen.kz – мобильді телефоннан сервирге ақпаратты сақтау.
startup.kz – инвесторларды іздеп жүрген стартаптар сайты.
“Xtime” – студенттермен интернетте жарияланатын қызықты тв бағдарлама(оны yvision және kiwi-ден тауып алуға болады).
KomekteZ.kz – қолдау/көмекке арналған әлеуметтік желі.



фотолардың авторы Сергей Сабанов
Шет елден келген қатысушылар, әрі тәжірибесі бар баркемперлер шараға жоғары баға берді және барлығы дерлік Баркемптің ұйымдастырушылары Елена Жетпісбаева мен Инесса Шлапакқа алғыстарын айтудан жалықпады.

енді ресми емес мәліметтерден
Соңғы күні Салтанат пен Айкомен кездестім. Айко жалғыз емес, Сәкінімен келді. Көшеде Айконы бірден танып қойдым, Сәкінді де “Қазақстан” қонақүйінің жанындағы паркте біраз қыдырып, әңгімелесіп қайттық.


фото Салтанаттікі

Жарты жылдай осы шараны күткен едім, ақыры қатыстым. Бұл жазбаны ресми түрде жазғым келмейді, себебі бұл мүмкін емес. Мен үшін осы баркемп ерекше өтті және оның дәл 2009 жылы өтуі өте дұрыс деп ойлаймын. Себеп? Биыл еліміздің Интернет қолданушылары сан жағынан өссе, Қазнеттің өзі сапа жағынан өсті. Жаңа сайттар, блогтар, сервистер көбейді. Barcamp CA 2009 арқылы көзбе-көз Қазнеттің проблемалары, жаңа идеялар талқыланып, жас стартаптарға демеушілік көрсету мүмкіндігі туды.

17 сәуір күні шараға келген қатысушылар тіркелуден өтіп, бір-бірімен танысып, білісті. Қазнеттің блогшылары, twitter мен yvision.kz – тің қолданушылары және Өзбекістан, Қырғызстан, Латвия, Украина, Беларусь т.б. елдерден келген баркемперлер КИМЭПте жиналды. Көбіміз бұрыннан танитын, бірақ өмірде кездеспеген адамдармен танысуға асықтық. Өз басым Твиттер және yvision-дағы таныстарыммен танысып(кейбіреулеріміз ник пен аватар арқылы бір-бірімізді танысақ, көбіміз фотодағы түрімізден танып қойдық; әйтеуір ол да бір қызық еді), бұрыннан танитын Лена мен Инесса (Баркемпті ұйымдастырған қыздар), Adam Kesher, Сардор (Ташкент), Бектұр мен Сымбатпен (Бішкек) кездестім.

18 сәуір күні презентациялар күні болды. Мен және алматылық Елдар микроблогингке байланысты презентация жасауға дайындалған едік. Қабырғаға ілінген кестеге өзіміздің презентациямыздың уақытын жазып қойдық. Бір кезде алдымнан Қуаныш шыға келді, қарасам қасында Ақзере, Салтанат пен Айкона тұр. Барлығымен танысып, әңгімелесіп, суретке түскен едік. Біраздан соң Нұргелді (оны көрмегелі қай заман) Қостанайдан ұшып келді. Бірнеше презентацияға қатыстық, өкінішке орай барлығына қатыса алмадық. Моблог, Yvision, PodKAZt, Opera mini-ді көріп қайттық.

Ақзере, Айконаның бір жұмыстары болып қалғасын, Салтанат екеуміз қалдық. Операның презентациясында Салтанат кімді көріп қалды деп ойлайсыз? Жанарбек аға да КИМЭПтің ішінде жүр екен. Оны көріп, амандасып, біраз сөйлестік.

Сол күні Қазақ блогшыларымен кездескеніме қатты қуанған едім. Қыздар блогтары сияқты әдемі, салмақты, ақылды!
Келгендеріне және презентацияма қатысқандарына көп рахмет!

Жалғасы бар. Келесі жазбада 19 сәуір немесе Idea markets/Startap competition мен Айконың Сәкіні жайында оқи аласыздар

Барлықтарыңызға сәлем!

Көп күткен Баркемп басталды, кеше тіркелу болса, бүгін презентациялар басталды.

Оларды мына жерден және кешегі суреттерді және видеоны мына жерден көруге болады.

Блогымда Журналистикаға байланысты (оның ішінде Интернет-журналистикаға) кеңестер ВВС – дің курстарынан алынғанын байқаған шығарсыздар («ВВС» атты ілмектері бар жазбаларды қараңыз). Бұл кеңестер интернеттегі жас журналистер үшін де, ақпараттық жазбалар жазатын блогшылар үшін де пайдалы болады деген үміттемін.
Сонымен қатар, блоггингке байланысты бөлек жазбалар бар. Бүгінгі таңда манимейкерлер мен SEO саласындағылар блог арқылы ақша табудың жүздеген әдіс-тәсілдерін ұсынуда, соның ішінде копирайтерлер үшін материал дайындаған кезде қалай жазу/қандай көлемде/қандай тақырыпта/қандай мақсатпен, т.с.с.
Ал біздің мақсатымыз – сапалы ақпарат дайындау, блогингті дамыту болғандықтан, осындай кеңестерден қажеттісің таңдап, Сіздерге ұсыну.
Сіздермен бірге қызықты блог-жазба жазу, оларды талқылау әрқашан да қызықты, әрі пайдалы. Сондықтан да бүгін Эрнест Хемингуэйдің өзінен сабақ алуға қалай қарайсыздар?

1. Қысқа сөйлемдерді қолдануға тырысыңыз.
Хемингуэй қысқа да нұсқа жазатын. Бұл ең ұтымды стиль. Толықтауыш сөздер мен эпитеттерді аямай сызып тастаңыздар, тек негізгісін қалдырыңыз. Керемет нәрселердің барлығы да қарапайым! Хемингуэйдың танымал әңгімесі алты сөзден ғана тұрған: “For sale: baby shoes. Never worn.”(«Сатылады: балаларға арналған аяқ киім, киілмеген»).
2. Қысқа кіріспелерді қолданыңыз.
Бір тақырыпта материал жазам деген кезде, оның алдындағы кіріспені созып жазбаңыз. Оқырманның тақырыпқа қызығушылығын тудыратын 1-2 сөйлем жазсаңыз да жетеді.
3. Тілдің энергетикасын қолданыңыз.
Түсініксіз, белгіссіздік тудыратын сын есімдер мен сөз тіркестерін қолданбаңыз. Етістіктерді қолданатын болсаңыз, заттарды нақтылап суреттеуге жеңіл болады, әрі cөйлемде қарқын пайда болады.
4. Өз өзіңізге сенімді болыңыз + позитив
Мысалы
• Негативті реңктегі сөздерді қолданбаңыз. «Аурмайтын», «сыздамайтын» деген сөздердегі «жарақат» мағынасы оқырманның көңілін міндетті түрде аудартады.
• «Қымбат емес» деген сөздің орнына «экономды» деп қолданған дұрыс.
• «Бұл бағдарламалық жасақтама қате жібермейді» дегеннен гөрі, оның сапасы жайында жазған дұрыс.
5. Ешқашанда тек 4 ережені қолданбаңыз.
Хемингуэй екі ережені де ұстанып, жүре алады. Ал кез келген блогшы немесе копирайтер үшін мынау түсінікті болу қажет: сапалы мәтін жазуды үйренген кезде, үш ереже жеткіліксіз. Әрдайым машықтану, іс-тәжірибе, ЖАЗУ қажет!

Ассалаумағалейкум! Міне қазақ қаріптерімен тағы да қиындық пайда болды. Туған тілінде өз ой пікіріңді жаза алмауым қандай қын? Бәлкім қазақ блогтары көбейе түскен сайын бұл мәселе де өз шешімін табар. “Көш жүре түзелер”. Гуглдың қазақ тілін енгізіуінің өзі осындай сенім ұялатады. Хош, Манхеттен!

12/10/2006

Дәл осы блог жазба қазақ тілді блоггингке жасалған алғашқы қадам. Посттың авторы – белгілі журналист, блогшы Асхат Еркімбай. Жаңа жылдың алдында Асхат ағамен онлайн, кейін оффлайн да кездесіп, сұхбаттасқанбыз. Төменде сұхбаттан үзінді.

А.Е.: Ең алғаш рет блогты Нью-Йоркта аштым. БҰҰ – ның шәкіртақысын жеңіп алған соң үш күндей Колумбия Университетінде арнайы курстарға қатыстық, соның бірі осы блогқа, жаңа медияға байланысты болды. Профессор үш минуттың ішінде сайт жасауға болатынын көрсетті. Мен ол кісіден: “Қазақша да жазуға бола ма?” деп сұрадым. Сөйтіп, сол күні кешке блог аштым. Еш қиындық болған жоқ. Бірінші рет Блогспот тұғырнамасынан аштым, себебі ол Гуглмен байланысты. 1-2 айдан соң блогспоттағы блогыма спам қаптап кетті. Онымен күресе алмағандықтан, Уордпреске көштім. Кейін уордпресті қазақшалау ісін қолға алдық қой…

Блог жайлы басқаларға түсіндірген кезде олардың реакциясы қандай еді және осыған қызуғышылық танытқандардың ойы, мақсаты не еді?

А. Е.: Америкадан келген соң бұрын жұмыс істеп жүрген газетім жабылып қалды, сосын интернетомания дертіне шалдыққан кезім ғой…Содан бір күні “Жаңаеуразияның” хабарландыруын көріп, резюмені жолдадым. Маған бұл жоба өте қызық көрінді.
Әрі бұл жобада жұмыс істесең, Прагада өтетені арнайы курсқа қатысасың деді. Сөйтіп, мен жұмысқа қабылдандым, ал жазда Прагада арнайы курс болды. Курсты американдықтар, еуропалдықтар жүргізді. Олар бұл күнде жаңамедияның аталары саналады десем артық айтқаным емес. Көп нәрсеге көзім ашылды. Келе сала, осы нәрсені қазақ жастарына жеткізуім керек деп шештім. Әуелі интернетті жақсы білетін, көзі ашық таныстарымды іздестірдім. Форумдарға «Рамсторда осылай-осылай кездесу болады деп хат жаздым». Сөйтіп алғашқы минибаркэмпке төрт-бес кісі келді: Бақытгүл, Қуаныш, Әділ, Думан, Рахат. Блог бастауды көрсеттім, сосын олар басқаларға айтты. Кейін Бақытгүлдң офисінде тағы бір семинар өткіздік. Күзде Бішкекте семинар болды… Блог жайлы басқаларға түсіндірген кезде, бірінші кезекте адамдардың қызығушылығын байқайсын. Бірақ бәрінде де: “Маған бұл не үшін қажет? Мен онда не жазамын? Менің жеке өмірім бәріне белгілі болады?” деген сұрақтар туады. Блогты тек шын ниеті барлар, Қазнетте қазақша мазмұндағы хабарларды көбейтесек дейтіндер бастады. Қазақстанның 4-5 қаласында 100-ден аса жастарға қазақ тілінде «Блог жүргізудің қыр-сыры» деген тақырыпта семинар өткіздім. Солардың тек 10 пайызы ғана әрі қарай блогты іліп әкетті, осының өзі мен үшін үлкен жетістік.Блог туралы бұрын кісілер аз білетін, бірақ бір жылдың ішінде бұл жайлы қазақ аудитория көп білетін болды. Себебі біз блог туралы айтқанда, сол жаңа медия көмегіне жүгіндік, әрі блогтың жақсы тұстарын: білімді дамытуға жәрдемдеседі, азаматтық қоғамды қалыптастырудағы құрал, қазақ тілінің әлеуетін көтерудің бір құралы ретінде таныттық..

Қазақ тілді Интернет – журналистика соңғы жылдары аз болса да дамыды ма, дамыса оған не ықпал болды, және оның болашағы қандай?

А. Е.: Қазақтілді интернет журналистика болуы үшін қазақ тілінде интернет басылымдар болуы керек. Мен әзірге таза қазақ тілінде ондай интернет басылымды көргенім жоқ. Біздегі интернет басылымдар тек газеттердің электронды көшірмесі. Сондықтан әзірге бөлек онлайн журналистика дегенді қарастырып жатқандар шамалы. Ал блогшылар – олар азаматтық журналистер. Оларды менің ойымша кәсіби журналистермен тең дәрежеде қарастыра алмаймыз. Қазақ тіліндегі интернет журналистиканың белгілері қазір блогтарда көрініс табуда. Сондықтан бұл сала дамиды деген пікірдемін. Форумдарда жүргенде ойлы, тәуелсіз пікір айтатын бірнеше дереккөзді сараптай алатын жандар баршылық. Қазақ тілі интернетте бизнес ретінде қарастырыла бастаған кезде қазақ тілінде онлайн журналистирге нағыз жұмыс табылады деп ойлаймын. Соңғы жылдары саяси ұйымдар қазақ тілді электоратқа назар аударып, қазақтар интернетте көбірек тұтына бастады. Осының өзі таяу арада қазақ тілінде интернет басылымға және онлайн
журналистерге сұраныс артатынын білдіреді.

Сіздің өмірлік принципіңіз қандай, алдағы жоспарыңыз?

Е.А.: Өмірлік принцип дейтіндей көп ұстанымдарым жоқ. Бастысы бар нәрсеммен бөліссем, ол ұлтымыздың дамуына пайдасы тиіп жатса болғаны. Алда бірнеше жобалар бар. Жаңаеуразия жобасын әрі қарай жалғастырамыз. Сосын тағы 1-2 қызықты жобаларды бастағалы жатырмыз, жеке өзіме келер болсам, осы ақпараттық технология саласын тереңірек оқып үйренуді көздеп жүрмін. Себебі біздегі бүгінгі ақпарат саясаты ескі медияның мамандарын дамытуға, олардың сапасын арттыруға пейілді емес.

Бұл сұхбаттан кейін қазақ тілді жаңа медианың болашағы бар және алдымызда(мүмкін, дәл осы жылы) қазақ тілді интернет қолданушыларды жаңа стартап-жобалар күтіп тұр деген үмітте қалдым. Ниет болса, алынбайтын асу жоқ- демекші, алға қойған мақсатқа жету үшін белсенділік пен талап бізде бар деп сенейік.
Осы жазбаны Асхат ағаның тағы бір сөзімен аяқтасам, …

«Менің ойымша, әркім өзінің қолынан келген кішкентай ісін дұрыс атқарса
болды. Бәріміздің илеп жүргеніміз бір терінің пұшпағы».

                                                                  Осы сөзді әр блогшы айтқан және де келешекте блог жүргіземін дегендер әлі де айтады. Алғашқы пост жазу үшін не істеу қажет, не жайында ойлану керек? Блог бастау-бұл автокөлік немесе жылжымалы мүлік сатып алу деген емес. Жеке бетті жүргіземін деп шешім қабылдау мен оны бастаудың арасында 10 минут уақыт болуы мүмкін және бұнда еш жамандық жоқ.

Бірақ, бұл сізге күткен/оң нәтиже әкеледі деген сөз емес. Себебі әр блогшының өзіндік тактикасы болған дұрыс. Адам блоггингке келгенде бір мезеттік сезімнің не эмоцияның құлы болуы мүмкін, яғни көкейінде жүрген пікірін не ойын жариялап, кейінде бұл тақырыпқа оралмай, басқа жаққа бұрып әкетіп, блогтың біріңғайлығын, идеялығын бұзады. Стильдерді талғау біраз уақытты алады. Басында блог бірнеше адаммен жүргізілгендей болып, кейін жеке, содан мүлдем жабылып, біраз уақыттан кейін жаңа тақырыппен қайта ашылған блогтардың өмір сүру үрдісі көптеп кездеседі.

Ақыры блог мүлдем жабылып қалған жағдайлар да болады, себебі жазатын тақырып қалған жоқ емес, бір тақырыптан екіншісіне көшу арқылы блогтың негізгі тематикасы байқалмай қалады. Бұны блогшының өзі де, оқырмандары да тез түсінеді.

Байқасаңыз, қазіргі кезде блогсосферадағы танымал блогтардың барлығы жайдан-жай, ойламаған жерден пайда болған жоқ. Олардың әрқайсысында негізгі тақырып, бағыт әуел бастан-ақ анықталған еді.

Өз ойым

Осыны аударған кезде өзімнің біраз қателіктерімді аңғардым. Бұл ақапарт әсіресе станделон блогтар үшін маңызды. Шынымен де өзіндік ережелерді енгізген дұрыс сияқты. Мысалы, мен осыны жазамын, ал мына тақырып блогымның бағытына келінкіремейді деген сияқты… Әр газеттің өзіндік редакциялық саясаты сияқты әр блогшы жеке беті үшін концепциясын құрастырып, бір бағытта блог жазбаларды жазса қандай нәтижелерге қол жеткізеді? Осы сұраққа бізге жаңадан келген блогшылар жауап береді деген үміттемін. Ал әзірге Қазақ блогшылардың көбісі сияқты Word Press-те өмір сүріп жүрміз және мұнда кім не туралы жазатынын да аңғарған секілдіміз. Барлықтарыңызға сәттілік тілеймін, блогтарыңыз мәнді де сәнді болсын!