Блог түрлері Сәуір 5, 2008
Posted by arsenal777 in блогер, блогинг.8 comments
Блогтардың авторы кез-келген адам бола алатыны бәрімізге белгілі. Заң немесе экономика саласында жазатын журналист немесе үй шаруасындағы әйелдің блогтары тақырып жағынан әртүрлі болатыны түсінікті, сонымен қатар жеке беттің мазмұны ғана емес, дизайны, орнатылған суреттері, ал ең бастысы оқырманы да әртүрлі болады. Осыдан біз блогтарды бір жүйеге келтіріп, түрге бөлгенді жөн көрдік.
Блог түрлері көп және оларды бір критерийге кіргізу оңай емес, себебі блог өзінің «еркінділігімен» ерекшеленеді. Мысалы, бір блогтың ішінде ғылыми тақырыптарға, автордың немесе кез-келген басқа адамның жекебас өміріне қатысты жазбалар және тұрмысқа пайдалы кеңестер болуы мүмкін. Осындай жағдайда блогтың жазбаларын салаларға бөлу – баспасөздегі Айдарлардың функциясын атқаратын бөлімдер бар. Жеке бетте «бөлімдер» немесе «айдарлар жинағы» деген жазудың астында автордың өзі құрастырған тақырыптарға сілтемелер жасалынады. Осылайша, бір блогтың ішінде бірнеше тақырыптарға жазбаларды жариялауға болады. Мысалы: суреттерім, аудармаларым, әңгімелерім, өлеңдерім, экономикалық зерттеулерім, т.с.с.
Тақырып жағынан блогтарды Ғылым, Саяси, Экономика, Дін, Спорт, Сән, Экология, Әлеуметтану, Мәдениет т.б. салаларға бөліп қарастыруға әрине болады, бірақ жоғарыда айтылғандай, бір блог бірнеше саланы қамтуы мүмкін, бұл заңды да. Себебі оқырман бір блогтан бірнеше тақырыпқа арналған жаңалық оқыса, уақытын үнемдейді, ал блогшы бірнеше тақырыпта сапалы ақпаратпен жеке-бетін қамтып отырса, танымалдылығы да, оқырман саны да күннен күнге артады. Блогтың түрін анықтау әдісі авторға блогжазбаларды жазу әдісі мен файлдық ерекшелігіне қарай бөлуге болады. Ашық энциклопедия «Википедияда» блогтар төмендегідей сұрыпталған:
Автор/Авторлар бойынша:
- Жеке(авторлық, жекеменшік) блог – бір адаммен жүргізіледі(яғни өзінің иесімен);
- «Белгісіздің» блогы – есімі анықталмаған блог иесі атыннан жүргізіледі;
- Ұжымдық блог – блог иесі тағайындайтын бірнеше адамның қатысуымен жүргізілетін блог;
- Корпоротивті блог – бір ұйымның қызметкерлерімен жүргізілетін блог.
Мультимедиа түрі бойынша:
- Мәтіндік блог – негізгі мазмұны тек қана мәтіннен құрылса;
- Фотоблог – тек қана фото өңімдерінен құрылған блог;
- Әуендік блог – тек қана ән-күйден құрылған блог;
- Подкаст және блогкастинг – блогтың негізгі мазмұны автормен оқылған МР3-түріндегі аудио файлдардан құрылады.
- Бейнеблог – блогтың негізгі мазмұны видеофайлдардан құрылған.
Мазмұн түрі бойынша:
- Контенттік блог – автордың алғашқы жазбасын өзгертпей жариялайтын блог;
- Мониторингтік(сілтемелік) блог – негізгі мазмұн басқа блогтардан алынған цитаталардан тұрады;
- Сплог - спам немесе Интернет пайдаланушы үшін рұқсатсыз жіберелетін жарнама мен хабарлардан тұратын блог.
- Тамблелог – басқа блогжазбалардан айырмашылығы қарапайымдылығында. Бұл блогтың түрі қойындәптерге ұқсас және Тамблелогтың бірнеше түрі бар:
1. қарапайым блогжазба;
2. сілтеме немесе тек қана бір салаға байланысты сілтемелер тізімі;
3. цитата;
4. әңгімелесу, мысалы Интернет арқылы 2 адамның хат алмасу арқылы пайда болған диалог;
5. бейне: фото немесе сурет;
6. YouTube, Yahoo.Video, My space сияқты сайттарда видеоны орнатып, блогта оған сілтеме жасау. Бұл сілтемелер бір тақырыпта топтастырылуы немесе әртүрлі болуы мүмкін.
Техникалық неізі бойынша:
- Stand alone(автономды) блог – бөлек хостингтегі немесе тұғырнамадағы блог. Бұндай блогтар веб-кеңістікте нақты иесінің жеке меншігі болып табылады;
- Блог-тұғырнамадағы блог – блог-қызметтер((Livejournal, Liveinternet т.б. сияқты) негізінде жүргізіледі;
- Моблог – мобильді веблог, бұндай блогтардың негізгі мазмұны вебте мобильді немесе портативті құрылғылар арқылы орналасады. Телефон немесе сандық құралдардың көмегімен қашықтықтан жаңартыла алатын блог.
